Пасля двух гадоў калоніі Таццяна з’ехала ў Польшчу. Але эміграцыя абярнулася для яе новым цяжкім этапам: больш за год яна жыла ў падвешаным стане, з пастаяннай трывогай і выдаткамі на юрыдычную дапамогу, якія пастаянна раслі. Таццяне патрэбна падтрымка, каб аплаціць паслугі адваката і юрыстаў.
У 2022 годзе Таццяну асудзілі на два гады калоніі па трох палітычных артыкулах: за «абразу Лукашэнкі», «абразу прадстаўніка ўлады» і «абразу суддзі». Яе прысудзілі да двух гадоў пазбаўлення волі. Жанчына цалкам адбыла тэрмін у гомельскай калоніі № 4.
«Я выйшла пасля двух гадоў турмы ўжо іншым чалавекам. Было падарвана і фізічнае здароўе, і псіхіка», – кажа Таццяна.
Пасля вызвалення яна зразумела, што заставацца ў Беларусі небяспечна, і ў студзені 2025 года з’ехала ў Польшчу. Там прыйшлося пачаць складаную і зацяжную працэдуру легалізацыі паводле Дублінскага пагаднення. Праз гэта Таццяна дагэтуль не можа афіцыйна ўладкавацца на працу і жыве выпадковымі неафіцыйнымі падпрацоўкамі.
«Праз тры месяцы пасля падачы мне прыйшла першая адмова. Мы пісалі апеляцыю. Потым была яшчэ адмова. І толькі 28 красавіка суд нарэшце прыняў рашэнне на маю карысць», – распавядае яна.
Нават пасля гэтага сітуацыя не вырашылася адразу. Канчатковае афармленне дакументаў займае месяцы. Да таго часу ў Таццяны няма паўнавартаснай стабільнасці, а ўвесь гэты час побач з ёй застаюцца даўгі за ўжо аказаную юрыдычную дапамогу.
«Пакуль я не ўбачу на руках рашэнне суда і дакументы, трывога ўсё роўна нікуды не дзенецца», – прызнаецца яна.
Таццяна кажа, што два гады калоніі і наступная нявызначанасць у эміграцыі цяжка адбіліся на яе псіхаэмацыйным стане. Яшчэ ў зняволенні ёй прызначалі антыдэпрэсанты, і пасля выезду з Беларусі лячэнне прыйшлося працягваць.
«Чым даўжэй цягнулася гэтая працэдура, тым горш станавілася. Узмацніліся трывога, парушэнні сну, панічныя станы. Я пастаянна назіраюся ў псіхіятра, і прэпараты даводзіцца ўзмацняць», – кажа Таццяна.
Зараз галоўнае для былой палітзняволенай – закрыць доўг за працу адваката і юрыстаў, якія суправаджалі яе справу ў Польшчы. Гэта дасць ёй магчымасць перайсці да нармальнага жыцця: дачакацца дакументаў, атрымаць права на афіцыйную працу і пачаць аднаўляцца пасля перажытага.
«Я вельмі хачу проста жыць спакойна, працаваць і больш не існаваць у бясконцым страху».
Сума збору
€1100
Аплата працы юрыстаў і адваката