Добры дзень!
Мяне завуць Ірына Траццякова, я беларуская праваабаронца. Апошнія чатыры гады я займаюся тым, што даю прававую і гуманітарную дапамогу беларусам, якія падвергліся палітычнаму пераследу.
А цяпер мне самой патрэбна ваша дапамога.
16 лютага 2021 года ў Беларусі адбылося каля сотні ператрусаў. Сілавікі ўрываліся ў дамы праваабаронцаў, незалежных журналістаў і ў офісы арганізацый – гэты дзень у СМІ ахрысцілі «чорным аўторкам». Ператрус правялі і ў доме маіх пажылых бацькоў у Віцебску, па адрасе маёй прапіскі.
Каб не падвяргаць бацькоў небяспецы і пазбегнуць рызыкі пазбаўлення волі, я была вымушана з'ехаць ўва Ўкраіну, дзе працягнула сваю дзейнасць. З пачаткам вайны ўва Ўкраіне я пераехала ў Нямеччыну, дзе да сённяшняга дня я кансультую беларусаў, якія сталі ахвярамі рэпрэсіяў, і дапамагаю ім знаходзіць прытулак і абарону ў краінах ЕС.
Мой ад'езд стаў цяжкім ударам для маіх бацькоў. Нягледзячы на тое, што я пакінула краіну, сілавікі працягвалі прыходзіць з ператрусам на адрас маёй прапіскі. Супраць мяне таксама была ўзбуджаная крымінальная справа па частцы 2 артыкула 342 Крымінальнага кодэкса Рэспублікі Беларусь (арт. 342 КК РБ — арганізацыя і падрыхтоўка дзеянняў, якія груба парушаюць грамадскі парадак).
У снежні 2023 года ў майго бацькі здарыўся інфаркт, і яму ўсталявалі два стэнты. У мамы таксама ўзніклі сур'ёзныя праблемы з сэрцам. Абследаванне паказала, што яе сардэчныя ссудзіны замкнутыя на 95%, 80% і 70%. Ёй тэрмінова патрабуецца аперацыя па аортакаранарным шунтаванні.
У Беларусі на такую аперацыю вялікая чарга, і маці можа не дачакацца. Пастаянны страх і чаканне новых ператрусаў толькі пагаршаюць яе стан, павялічваючы рызыку ўскладненняў. Акрамя таго, зыход такіх аперацый у Беларусі часта непрадказальны з-за недахопу кваліфікаваных спецыялістаў і недастатковых умоў. Улічваючы ўзрост маёй мамы, верагоднасць ускладненняў асабліва высокая.
Таму я вырашыла шукаць дапамогу за мяжой. Пасля разгляду ўсіх дакументаў альянс кардыяклінік у Нямеччыне Nordrhein-Westfalen Clinic Complex пагадзіўся правесці аперацыю. Яны гатовы пачаць лячэнне адразу пасля ўнясення дэпазіту ў памеры € 60.000, які пакрые аперацыю, медыцынскі дагляд і рэабілітацыю.
На жаль, мне не пад сілу сабраць такую суму ў адзіночку. І кінуць сваю маму я таксама не магу. Усе гэтыя гады я змагалася за справядлівасць і правы іншых людзей, а цяпер надышоў час змагацца за жыццё самага дорага мне чалавека. Я веру ў вашу падтрымку і шчыра прашу вас аб дапамозе.
З надзеяй,
Ірына Траццякова.
Сума збору
€60.000
У гэтую суму ўваходзіць:
Аперацыя па каранарным шунтаванні: гэтая працэдура ўключае некалькі складаных умяшанняў, але без неабходнасці складанай інтэнсіўнай тэрапіі.
Катэтэрызацыя сэрца: працэдура ўключае ўвядзенне катэтара праз артэрыю для правядзення неабходных даследаванняў каранарных сасудаў і сэрца.
Каранарная ангіяграфія: гэта абследаванне дазволіць візуалізаваць каранарныя артэрыі, каб ацаніць іх стан.
Вымярэнне ціску і вентрыкулаграфія: у межах працэдуры будзе вымераны ціск у сэрцы і аорце, а таксама візуалізуецца дуга аорты для ацэнкі яе стану.
Шунтаванне аорты і каранарных артэрый: будзе выкарыстаная ўласная артэрыя пацыента, напрыклад, унутраная грудная артэрыя, для стварэння абыходнага шляху вакол заблакаваных участкаў каранарных артэрый.
Пераліванне крыві і кампанентаў: Можа запатрабавацца пераліванне крыві, у тым ліку эрытрацыты і трамбацыты, у залежнасці ад ходу аперацыі.
Інтэнсіўная тэрапія: пры неабходнасці будзе праведзена базавая інтэнсіўная тэрапія для падтрымання жыццёва важных функцый арганізма ў пасляаперацыйны перыяд
Дадатковыя выдаткі: уключаюць рызыкі, звязаныя з аперацыяй, і адміністрацыйныя надбаўкі для замежных пацыентаў.
(фонд BYSOL мае ўсе пацвярджальныя медыцынскія дакументы)