У 2020 годзе кожную нядзелю я выходзіў на маршы ў сваім абласным горадзе, пратэстуючы супраць дзеянняў рэжыму. Прайшло больш за год і ў снежні 2021 года мяне раптоўна арыштавалі – група захопу выцягнула наўпрост з дому.
Новы год я сустрэў у СІЗА, а праз некалькі месяцаў следства суд вынес рашэнне па артыкуле 342* – тры гады “хіміі”**. Усе гэтыя тры гады я быў вымушаны працаваць на нізкааплатнай працы. З майго маленькага заробку вылічвалі 75% на карысць дзяржавы. Выходзіла ў месяц на рукі каля 120-160 рублёў, з якіх трэба было яшчэ плаціць за пражыванне. У выходныя дні я павінен быў кожную гадзіну адзначацца па званку. У краму ці паліклініку мы выязджалі толькі з супрацоўнікамі міліцыі, і нават у такой просьбе маглі адмовіць без прычыны.
Падчас адбывання тэрміну ў мяне сапсаваліся два зуба, але вылечыць іх за гэты час не было магчымасці: ні грошай на лячэнне, ні дазволу на наведванне стаматолага ў мяне не было. Цяпер замест лячэння мне патрабуецца пратэзаванне гэтых двух зубоў.
У гэты час, пасля вызвалення, я знаходжуся на прафілактычным уліку**, вымушаны рэгулярна адзначацца ў аддзяленні міліцыі па месцу рэгістрацыі, дзе са мной праводзяць «прафілактычныя гутаркі» і правяраюць змест тэлефона. Любыя тры парушэнні, на іх погляд, могуць абярнуцца для мяне калоніяй.
Нягледзячы на ўсе абставіны, я не губляю надзеі атрымаць свабоду. Я вырашыўся прасіць дапамогі, каб мець магчымасць з'ехаць у Польшчу ад палітычнага пераследу і звярнуцца да пратэзіста, не баючыся апынуцца ў турме.
Мне страшна заставацца ў Беларусі далей, але і ехаць без грошай у чужую краіну таксама страшна. Працаваць я не баюся, але мне спатрэбіцца нейкі час, каб асвоіцца і знайсці працу і жыллё.
Дапамажыце, калі ласка, мне выбрацца на волю!
*Артыкул 342 КК РБ. Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх. Караюцца штрафам, ці арыштам, ці абмежаваннем волі на тэрмін да трох гадоў, ці пазбаўленнем волі на той жа тэрмін.
**«Хімія» – гэта від пакарання, калі асуджанага адпраўляюць у папраўчую ўстанову адкрытага тыпу (ВУАТ). Людзі жывуць у карпусах, падобных да інтэрнатаў. Яны знаходзяцца пад пастаянным наглядам і абавязаны выконваць правілы ўнутранага распарадку, пры гэтым плацяць за пражыванне, купляюць ежу за свой кошт, самі рыхтуюць, сціраюць і прыбіраюць. Усе асуджаныя абавязаны працаваць, часта іх накіроўваюць на нізкакваліфікаваную і малааплатную працу.
***Прафулік (прафілактычны ўлік) – паводле заканадаўства РБ, гэтае назіранне за паводзінамі грамадзяніна, у мэтах папярэджання з яго боку падрыхтоўкі ці здзяйснення правапарушэнняў. Фактычна ўключае ў сябе раптоўныя праверкі па месцы жыхарства, у тым ліку, у начны час, рэгулярныя адзнакі ў аддзяленні міліцыі, праверку змесціва тэлефона.
Сума збору
€2000
€1600 – арэнда жылля на 2 месяца (на перыяд пошуку працы)
€800 – кошт пратэзавання (адзін зуб – ад €400)