Паводле прафесіі я аператар станкоў з лічбавым праграмным кіраваннем. Да 2020 года жыў звычайным жыццём: на момант выбараў шукаў працу, але заўсёды ўважліва сачыў за тым, што адбываецца ў краіне. Калі пачаліся пратэсты, я не змог заставацца ў баку – удзельнічаў у нядзельных маршах і маршах пенсіянераў. Пасля таго, як пратэсты былі падаўленыя, я нейкі час спадзяваўся, што ўсё можа ўспыхнуць зноў, але да зімы стала зразумела: усё скончана. Затрыманні шлі поўнай хадой, і я разумеў, што ў любы дзень магу стаць чарговым «пакаянным» на відэа ГУБАЗіКа, таму пачаў рыхтавацца да ад'езду.
У чэрвені 2023 года я пакінуў Беларусь і апынуўся ў Нідэрландах, дзе падаў запыт на міжнародную абарону. Амаль два гады бадзяўся па лагерах для ўцекачоў, у тым ліку ў плывучым лагеры ў Амстэрдаме. Працаваць не меў права: я патрапіў пад Дублінскую дамову, паводле якой краінай разгляду заяўкі лічыцца краіна ўезду. Паколькі ў мяне была польская віза, у 2025 годзе мяне дэпартавалі ў Польшчу.
Польшча адразу адмовіла мне ў статусе і ўручыла дакумент з патрабаваннем пакінуць краіну на працягу 30 дзён. Я падаў апеляцыю і паўторную заяўку на абарону і цяпер зноў чакаю рашэння – увесь гэты час у мяне няма права легальна працаваць.
Яшчэ ў Беларусі мне паставілі дыягназ: арганічнае засмучэнне асобы. Я пакутую на панічныя напады і нестабільнасць настрою. Жыву без медыцынскай падтрымкі, бо не маю доступу да паўнавартаснай дапамогі. Часам роспач даходзіць да таго, што хочацца вярнуцца назад — нягледзячы на рызыку. У 2023 годзе ў Telegram-канале ГУБАЗіКу з'явілася паведамленне з маімі анкетнымі дадзенымі і патрабаваннем з'явіцца і выдаліць «палітычныя каментары». На мой запыт прыйшоў адказ: «Звяртайцеся ў камісію па вяртанні». Гэтага дастаткова, каб зразумець: пагроза рэальная.
Цяпер у мяне няма фінансавай падушкі, трэба аддаваць даўгі. Я прашу аб дапамозе, каб проста перажыць гэты перыяд: аплаціць жыллё, харчаванне і лекі. Вашая падтрымка – гэта выратавальнае кола, якое дапаможа мне пратрымацца і зноў устаць на ногі.
Сума збору
€1800
€700 – арэнда жылля
€145 – камунальныя паслугі
€455 – харчаванне, бытавыя выдаткі, мабільная сувязь
€300 – лекі і псіхатэрапеўтычная падтрымка
€200 – вяртанне пазык