Ігара* прыцягнулі да крымінальнай адказнасці за перадачу інфармацыі пра перамяшчэнне ваеннай тэхнікі праекту «Беларускі Гаюн». Пасля вызвалення з-пад варты ён пакінуў Беларусь і просіць дапамагчы яму з перанавучаннем.
Пасля пачатку паўнамаштабнай вайны Расіі супраць Украіны я перадаваў праекту «Беларускі Гаюн» інфармацыю пра перамяшчэнне ваеннай тэхнікі. Я разумеў, чым гэта можа для мяне скончыцца, але ў той момант не мог інакш.
З’ехаць з Беларусі я планаваў пазней. Але не паспеў – мяне затрымалі.
Некалькі месяцаў я правёў у СІЗА. Менавіта там я канчаткова вырашыў: калі атрымаю магчымасць высці на свабоду, то пакіну краіну. Суд прызначыў мне некалькі гадоў абмежавання волі з накіраваннем у папраўчую ўстанову адкрытага тыпу («хімія»). Пасля вызвалення з-пад варты я з’ехаў з Беларусі.
Праблемы з сілавікамі пачаліся задоўга да гэтага. Пасля выбараў 2020 года я ўдзельнічаў у мірных пратэстах. У адзін з першых дзён пратэстаў па дарозе дадому мяне збілі супрацоўнікі міліцыі – у мяне захавалася медыцынскае пасведчанне атрыманых траўм.
Нягледзячы на гэта, я працягваў выходзіць на мірныя маршы і па магчымасці дапамагаў людзям, якія сутыкнуліся з наступствамі рэпрэсій. Аднойчы сілавікі прыйшлі да мяне дадому, але мяне там не было на той момант. Пазней мяне таксама выклікалі ў КДБ з прычыны зробленых ахвяраванняў, пасля чаго прыйшлося сплаціць штраф.
Цяпер я знаходжуся ў Польшчы і спрабую нанова выбудаваць жыццё, якое прыйшлося пакінуць у Беларусі.
Да затрымання я некалькі гадоў развіваўся ў сферы лічбавага праектавання, 3D-мадэлявання і сучасных тэхналогій вытворчасці. Самастойна асвойваў прафесійныя інструменты, працаваў над праектамі і паступова паглыбляўся ў стварэнне фізічных аб’ектаў. Я разлічваў зрабіць гэтакую сферу сваёй прафесіяй, але затрыманне, месяцы ў СІЗА і вымушаны ад’езд перапынілі гэты шлях.
Цяпер у мяне з’явілася магчымасць да яго вярнуцца. Я працягваю навучанне, працую над уласным праектам, асвойваю новыя інструменты і замацоўваю навыкі, якія ў далейшым выкарыстую ў працы.
Частку выдаткаў на навучанне ўжо пакрыў іншы фонд. Але не ўсе. Выдаткі, што засталіся, мне неабходна аплаціць самастойна. Акрамя таго, пакуль я праходжу навучанне і шукаю працу, мне трэба аплачваць жыллё.
Буду ўдзячны за любы ўнёсак і распаўсюджванне збору. Ваша падтрымка дапаможа мне прайсці гэты апошні этап і вярнуцца да самастойнага прафесійнага жыцця.
*Гэта ананімная гісторыя. У мэтах бяспекі мы змянілі імя героя і схавалі некаторыя дэталі.
Сума збору
€2200
€1200 – выдаткі, звязаныя з навучаннем
€1000 – арэнда жылля на час навучання і пошуку працы