Добры дзень!
На сувязі каманда збораў BYSOL.
Мы адкрываем гэты збор, каб дапамагчы акцёру і тэлевядоўцу Аляксандру Ждановічу (вядомаму шмат каму як Маляваныч), у якога тэлефонныя махляры скралі €3000.
18 кастрычніка Аляксандр павінен быў ладзіць вечар Батлейкі ў варшаўскім Беларускім моладзевым хабе. Перад самым выступам яму патэлефанавалі «супрацоўнікі банка» і паведамілі трывожную навіну — нібыта была спроба зняць сродкі з ягонага рахунку. Каб абараніць грошы, Аляксандру трэба было тэрмінова прадставіць асабістыя дадзеныя… У выніку доступ да банкінгу аказаўся заблакаваны, а сродкі выкрадзеныя.
— Махляры спачатку размаўлялі па-украінску. Калі я сказаў, што кепска яе ведаю, перайшлі на расійскую мову. Вядома, шмат што мусіла мяне насцярожыць. Але гэтыя «артысты» мяне купілі на тое, што назвалі некаторыя дадзеныя, якія, як я думаў, маглі ведаць толькі сапраўдныя супрацоўнікі банка. Увогуле, як прафесіянал скажу: сыграна на выдатна — падзяліўся пазней Аляксандр.
Калі Аляксандр зразумеў, што стаўся ахвярай ашуканцаў, ён заблакаваў карту і звярнуўся ў банк, але было ўжо позна — вярнуць грошы не ўдалося. З €3000 на яго рахунку засталося зусім няшмат.
– Агулам рахунак заблакаваны. Раяць тэлефон абнавіць ды першапачатковых наладак і паставіць антывірус.
Аляксандр Ждановіч — чалавек, які цягам многіх гадоў дарыў беларусам радасць і святло сваёй творчасцю. Ён працаваў у Нацыянальным акадэмічным драматычным тэатры імя Горкага, а з 1996 года быў вядучым праграмы «Калыханка» (на думку Каманды збораў BYSOL, Маляваныч — лепшы вядучы дзіцячай перадачы ўсіх часоў і народаў).
Увосень 2020 года яго арыштавалі на дзевяць сутак за ўдзел у мірнай акцыі, калі ён заступіўся за жанчыну, на якую крычаў АМАПавец. У 2021 годзе акцёра звольнілі з тэатра паводле артыкула 47 Працоўнага кодэкса — праз страту даверу з боку наймальніка.
У пачатку 2022 года, калі ціск узмацніўся, і акцёра пачалі зноў выклікаць на допыты, ён быў вымушаны эміграваць у Грузію, а потым пераехаў у Польшчу.
Цяпер Маляванычу патрэбная наша дапамога. Любая падтрымка, ці невялікае ахвяраванне, ці проста распаўсюд інфармацыі (але не забывайце пра сваю бяспеку), дапаможа вярнуць страчанае.
З падзякай,
Каманда збораў BYSOL.
Сума збору
€3000
Столькі грошай было на рахунку ў Маляваныча да таго, як яму патэлефанавалі махляры.