Добры дзень, дарагія беларусы!
Я была вымушаная з'ехаць праз рэпрэсіі па справе INeedHelp. На жаль, я не магу адкрыта папрасіць вас аб дапамозе, бо мае блізкія ўсё яшчэ ў Беларусі, а я экстрана выехала з краіны і змагла з сабой узяць, што паспела.
Гісторыя маёй дзейнасці як валантэркі пачалася восенню 2020 года, калі затрымалі маіх сяброў і знаёмых. Даведаўшыся, што мая сяброўка пасля мірнага маршу была затрыманая, я вельмі хутка сабрала для яе ўсе неабходныя рэчы і прынесла да РАУС, дзе яна знаходзілася. На шчасце, праз некалькі гадзін сяброўку выпусцілі.
Але затрыманні працягнуліся. Затрымлівалі з прычыны палітычнага пераследу не толькі маіх сяброў, але і іншых актывістаў нашага горада ў Віцебскай вобласці. Мне прыйшла ідэя сфармаваць некалькі гатовых перадач у ІЧУ і СІЗА, каб мець потым магчымасць іх хутка перадаваць. Здзяйсняючы пакупкі для перадач у турму, я вельмі спадзявалася, што яны не спатрэбяцца. Аднак усё спатрэбілася. І я працягнула займацца зборам перадач для палітвязняў, бо рэпрэсіі толькі ўзмацняліся.
Дапамогу я аказвала не толькі затрыманым і палітвязням, але і іхным сем'ям. У працэсе падрыхтоўкі турэмных перадач, я пазнаёмілася з бацькамі, мужам і жонкай і дзецьмі шматлікіх затрыманых і асуджаных. Каб падтрымаць і маральна, і матэрыяльна сваякоў палітвязняў, я і іншыя валантэры да святаў збіралі харчовыя кошыкі, кветкі, грошы, вітаміны і канцтавары. Мы бачылі як цяжка тым, чые блізкія ў турме, і не маглі застацца ў баку.
23 студзеня 2024 года мяне затрымалі і правялі ператрус у маім доме, а пасля адправілі на допыт у КДБ. Там я знаходзілася ў статусе сведкі і мне задавалі пытанні пра жонак палітвязняў. У той дзень затрымалі шмат каго з маіх знаёмых і некаторых з іх не выпусцілі. Таму, калі мяне выклікалі на размову ў РАУС, я зразумела, што магу адтуль ужо не выйсці. На працягу гадзіны я сабралася і выехала з Беларусі, узяўшы з сабой мінімум рэчаў.
Мае асцярогі былі не марныя. Праз тыдзень я даведалася, што адной маёй знаёмай задавалі пытанні наконт мяне і маёй валантэрскай дзейнасці для палітвязняў. Маё затрыманне было б пытаннем часу.
Цяпер я адна ў Грузіі і праходжу той шлях, які прайшлі многія з вас. Таму спадзяюся на вашае разуменне і падтрымку! Тыя грошы, што я пазычыла і паспела ўзяць з сабой, пайшлі на квіткі і арэнду жылля на першы час. Цяпер я шукаю працу на новым месцы, але пакуль мне не тое, што абавязак аддаць, нават купіць простыя бытавыя рэчы цяжка — я з'ехала з Беларусі з адным заплечнікам.
За час маёй валантэрскай працы я бачыла так шмат неабыякавых людзей, што веру і спадзяюся на падтрымку маіх суайчыннікаў! Цяпер, на жаль, дапамога спатрэбілася мне.
Сума збору:
€2000
€1000 – арэнда жылля (€370 за 1 месяц. Агульная сума неабходная на 3 месяцы да прылады на працу і атрымання зарплаты)
€300 – квіток на самалёт (грошы на яго пазычаныя)
€700 – на куплю неабходных прадметаў побыту, тэлефон, інтэрнэт, прадукты, адзенне