Добры дзень!
Мне небяспечна называць сваё імя (BYSOL пацвярджае персанальныя дадзеныя героя), бо жыву з сям'ёй у Беларусі. Але нават без імёнаў, спадзяюся, мая гісторыя, будзе зразумела многім людзям, хто ведае пра рэпрэсіі ў Беларусі, і кране іх сэрцы.
Да 2020 года мой удзел у палітычным жыцці краіны быў сціплы. Я хадзіў на выбары, у надзеі, што мой голас нешта зменіць, але ў перамены асабліва не верыў. А ў 2020 годзе ўсё змянілася!
10 жніўня 2020 года я пабачыў на ўласныя вочы, як мірных людзей у маім родным горадзе б'юць, у іх страляюць. Я быў бязмежна абураны! У момант далучыўся да пратэстоўцаў і патрапіў у сутычку з міліцыяй.
Наступным днём я ішоў дадому з працы. Нечакана да мяне падышлі 5 незнаёмцаў, заштурхалі ў аўтазак і электрашокерам выбілі пароль ад тэлефона. Тэлефон я паспеў разбіць, так што пароль ім не спатрэбіўся. Пасля мяне адвезлі ў РАУС, дзе працягвалі біць і здзекавацца. Трое содняў я збіты правёў у ІЧУ ў перапоўненай камеры. Пасля я 2 тыдні практычна не мог хадзіць (пашкодзілі звязкі на правай назе), нейкі час баяўся пераследу. Нідзе ў адкрытым доступе не знайшоў сябе на фота ці відэа. Я супакоіўся, што на мяне ўжо забыліся.
Месяц ішоў за месяцам. Рэпрэсіі ў краіне ўзмацніліся, пратэстны рух з вуліц сышоў. У гэты час мы с жонкай даведаліся, што чакаем трэцяга дзіцёнка, і я вярнуўся да свайго звычайнага жыцця. Праз паўгоды пасля выбараў я дазнаўся, што мяне шукалі па месцы рэгістрацыі, дзе я не жыву. Гэта быў першы званочак. Але я вырашыў не з'язджаць з краіны, не мог пакінуць цяжарную жонку і дзяцей. І, шчыра кажучы, не думаў, што ўсё скончыцца рэальным тэрмінам! Аднак не прайшло і двух месяцаў, як па мяне прыйшлі. Арыштавалі проста на вачах шакаваных сваякоў і адправілі ў СІЗА. Праз паўгоды суд прыгаварыў мяне да 3 гадоў пазбаўлення волі, нягледзячы на тое, што ў нас з жонкай было двое маленькіх дзяцей, а падчас майго зняволення нарадзіўся трэці.
З-за палітычнага артыкула, па якім мяне асудзілі, супрацоўнікі калоніі ставіліся да мяне прадузята, чапляліся да кожнай дробязі і рэгулярна складалі пратаколы аб парушэннях. Праз гэтыя пратаколы я перыядычна трапляў у ШІЗА*. Гэта асобны від катавання зняволенага. У камеры ШІЗА ты адзін, пазбаўлены перадач і лістоў, нары прышпілены, святло ўвесь час гарыць, ёсць толькі бетонны стол і лаўка. Знаходзіцца там невыносна. А мне ў камеры зімой яшчэ і вокны спецыяльна пакідалі адчыненымі. Холад пасярод гэтага бетоннага мяшка быў такі страшны, што думаў, не выйду адтуль жывым.
Увесну 2024 года мяне вызвалілі. Але жыццё маё стала свабодным толькі часткова, бо мне прызначылі яшчэ 2 гады прэвентыўнага нагляду**. Звычайна яго прызначаюць адбыўшым тэрмін за асабліва цяжкія злачынствы. А зараз яго сталі даваць і палітычным. Па ім мне забаронена пакідаць межы горада, кожную нядзелю я павінен адзначацца ў ворганах унутраных спраў, і некалькі разоў на тыдзень дадому прыходзіць праверка.
Зараз разам з жонкай гадуем дзяцей, будуем дом. Жонка толькі нядаўна знайшла працу пасля дэкрэта, я таксама крыху падзарабляю. Але прыбытак у нас вельмі сціплы. Вялікая частка яго ідзе на будаўніцтва дома, які мы пачалі яшчэ да 2020 года. Акрамя таго, пакуль я сядзеў у калоніі, жонцы прыйшлося ўзяць крэдыт, каб плаціць за кватэру, клапаціцца пра дзяцей, нават мне дапамагала. У той складаны час гэты крэдыт нас вельмі выратаваў. Але цяпер арэнда кватэры і крэдыт забіраюць ільвіную долю нашага невялікага даходу.
Мы будзем удзячныя вам за дапамогу выплаціць крэдыт. Марым хутчэй дабудаваць дом, выправіць нашае жыццё і больш не жыць у галечы.
*ШІЗА (штрафны ізалятар) – гэта памяшканне для зняволеных, дзе ўмовы ўтрымання значна больш жорсткія, чым звычайна. Зняволеныя ў ШІЗА пазбаўлены шматлікіх прывілеяў, такіх як перадачы, спатканні і шпацыры, і часта цярпяць узмоцнены фізічны і псіхалагічны ціску.
**Прэвентыўны нагляд – гэта мера кантролю, якая прымяняецца да людзей пасля іх вызвалення. Яна ўключае рэгулярную праверку з боку супрацоўнікаў міліцыі, забарону на ўдзел у пэўных мерапрыемствах, забарону на выезд з краіны і горада, абавязак паведамляць аб змене месца жыхарства і працы. Могуць быць накладзены дадатковыя абмежаванні.
Сума збору
€2000
€1300 – арэнда жылля на 6 месяцаў (€220/мес) (спадзяюся, што за 6 месяцаў мы дабудуем дом з большага і пачнём паволі пераязджаць)
€700 – выплаціць крэдыт (крэдыт брала жонка, каб утрымліваць сям'ю, пакуль я адбываў