Добры дзень!
Мяне завуць Рамановіч Аляксандр. Я актывіст, палітык і (зусім няшмат) праваабаронца.
Пачынаючы з 2003 года я ўдзельнічаў ці ледзь не ва ўсіх перадвыбарных кампаніях у розных ролях: быў назіральнікам, сябрам участковай камісіі і кандыдатам у дэпутаты розных узроўняў. З 2007 года сябра партыі БНФ і руху «За Свабоду». Падтрымліваў і іншыя ініцыятывы.
Партыя БНФ – найстарэйшая апазіцыйная партыя Беларусі, якая выступае за незалежнасць нашай краіны, дэмакратызацыю ўлады, адраджэнне беларускай мовы і культуры.
Рух «За Свабоду» – аб'яднанне беларускіх дэмакратычных сіл, а таксама грамадзян Беларусі для сумеснай абароны і рэалізацыі грамадзянскіх, сацыяльных, культурных і іншых правоў.
нататка BYSOL
У 2020 годзе я таксама ўдзельнічаў у шматлікіх мірных акцыях пратэсту супраць фальсіфікацыі вынікаў выбараў. І пасля таго, як пачаліся масавыя затрыманні і арышты, я не здаўся і пачаў аказваць прававую дапамогу людзям: кансультаваў, рыхтаваў да судовых працэсаў. Таксама я наведваў судовыя пасяджэнні па палітычных працэсах і падтрымліваў людзей аж да майго апошняга затрымання ў 2024 годзе.
Агулам з 2020 па 2024 год я прыцягваўся да адміністрацыйнай адказнасці 7 разоў. У мяне дома былі ператрусы і агляды з розных прычынаў. Акрамя таго, мяне пазбавілі дапамогі па доглядзе брата, інваліда 1 групы.
А ў сакавіку 2024 года раніцай, выламаўшы дзверы ў хаце, да мяне ўварваліся супрацоўнікі ГУБАЗіК з сілавікамі «Шторму». Яны выцягнулі мяне з ложка, катавалі, білі, выломвалі рукі за спінай – усё таму, што напярэдадні была заведзеная чарговая крымінальная справа супраць праваабарончага цэнтру «Вясна», і сілавікі шукалі сувязь паміж мной і «Вясной», каб прыцягнуць мяне па гэтай справе. Аднак дабіцца прызнання ці выявіць нейкія сувязі з арганізацыяй яны не змаглі, таму мне прызначылі дату суда і адпусцілі дадому.
А праз некалькі дзён у сябе на тэлефоне я выявіў усталяваную шпіёнскую праграму, замаскаваную пад «сістэмныя наладкі» з шырокім доступам да ўсіх функцый тэлефона: камеры, мікрафону, месцазнаходжання, файлаў і г.д., і выдаліў яе. Праз пару гадзін да мяне зноў уварваліся сілавікі, і зноў катавалі. Але паколькі ў іх не было зачэпак, каб завесці на мяне крымінальную справу, мяне перадалі ўчастковаму, які склаў чарговы пратакол аб «адміністрацыйным правапарушэнні», па якім я адсядзеў чарговыя 15 сутак.
(BYSOL мае дакументы, якія пацвярджаюць гісторыю)
Пасля гэтага, адседзеўшы 15 сутак і не чакаючы чарговага арышту, я тэрмінова з'ехаў з Беларусі. Цяпер знаходжуся ў Польшчы і маю патрэбу ў вашай дапамозе. Мне патрэбны час і рэсурсы, каб прыйсці ў сябе і знайсці новае месца ў новым свеце.
Сума збору:
€3500
Мне трэба зняць жыллё ў Польшчы на бліжэйшыя 2-3 месяцы, пакуль я буду асвойвацца і шукаць працу – €1500
Мне таксама трэба купіць шмат базавых рэчаў, накшталт адзення і прадметаў побыту, бо я з'яжджаў у спешцы, і ў мяне не было часу, каб падрыхтавацца да паездкі–- €1000
Таксама мне патрэбны сродкі на ежу і самыя неабходныя патрэбы (на тыя ж 2-3 месяцы), пакуль я буду шукаць сваё месца – €1000