На пратэст мы выйшлі з сынам. Спачатку гэта былі акцыі салідарнасці, жаночыя ланцугі, маршы. Потым – цэлы рух у нашым горадзе. Я рабіла плакаты, шыла сцягі з прасцінаў, арганізоўвала людзей: кожны дзень, кожны вечар, мы выходзілі, падтрымлівалі страйкоўцаў на заводах, лекараў, настаўнікаў.
Сын быў маім галоўным памочнікам, ён з дзяцінства марыў быць вайскоўцам і казаў мне: «Мама, падчас наступных выбараў у 2025 году я буду служыць. Але я хачу прысягаць народу, а не прэзідэнту. Мы мусім штосьці рабіць». І мы пайшлі на вуліцу — разам. За нашую актыўнасць у наш бок пачалі пераслед.
Аднойчы ноччу сілавікі прыйшлі да мяне дадому. Я чула, як адзін з іх сказаў: «Дома яна, сука. Выбіваем акно і пакуем». Мы з сынам выбраліся ў агарод, цераз плот прабраліся на могілкі і засталіся там да раніцы. Гэта было страшна, але бяспечней, чым дома. Пасля гэтага я адправіла яго да сваякоў, а сама працягвала арганізоўваць акцыі. У канцы кожнай пыталася: «У каго можна пераначаваць?» Так прайшоў яшчэ адзін пратэставы месяц – па чужых кватэрах, але на волі.
Мой апошні мітынг адбыўся 30 жніўня 2020 году. Тады былі жорсткія затрыманні. Я была ў калоне з пратэстоўцамі, патэлефанавала сыну: «Збірай рэчы і дакументы». 4 верасня 2020 года мы пакінулі Беларусь. Была толькі адна валіза на дваіх і 300 даляраў. У Польшчы пачалося новае жыццё – мітынгі, акцыі, дапамога іншым. Мы не здаваліся.
Але здароўе аказалася не вечным. Пасля ўсяго перажытага ў мяне пачаліся сур'ёзныя праблемы – здранцвенне і адмова левага боку цела. Лекары паставілі дыягназ: запаленне галаўнога і касцявога мозга. Я не магу працаваць, бо арганізм знясілены. Сын вучыцца ў ваенным тэхнікуме ў Польшчы – ён па-ранейшаму ідзе да сваёй мары, нягледзячы ні на што.
Цяпер я праходжу лячэнне ў Варшаве. Мы на мяжы — грошай катастрафічна не хапае. Я прашу вашай падтрымкі, каб мы маглі выжыць у гэты складаны перыяд, які працягнецца яшчэ каля чатырох месяцаў. Я не зламаная і веру, што дапамога, як і ў 2020-м, залежыць ад нас саміх. Дзякуй усім беларусам і неабыякавым людзям. Усім, хто дапамагае.
Жыве Беларусь!
Сума збору
€4600
– 9000 zł (прыкладна €2100) – арэнда жылля на 3 месяцы
– 3900 zł (каля €900) – бытавыя выдаткі і рэчы першай неабходнасці
– 4500 zł (каля €1050) – харчаванне і камунальныя
– 2400 zł (каля €550) – лекі і рэабілітацыя