Вітаем! Мы сябры Мікіты.
На жаль, сам Мікіта не можа падаць заяўку, бо адно яго вока бачыць толькі 1% навакольнага свету, а другое вока — каля 3%. Іншымі словамі, наш сябар можа адрозніваць святло і цемру. Яшчэ ён бачыць вельмі кантрасныя прадметы. Але ніякіх тэкстаў Мікіта сам пісаць пакуль не ўмее. Аднак так было не заўсёды.
Мікіта пачаў страчваць зрок пасля таго, як яго збілі ў 2020 годзе. Ён атрымаў чэрапна-мазгавую траўму, расколіну ніжняй сківіцы і мноства гематом па ўсім целе. А праз некаторы час у яго пачаў паціху атрафавацца зрокавы нерв. Мікіта не адразу зразумеў, што губляе зрок, бо гэта доўгі працэс. Кожны дзень ён бачыў крышачку горш. І ў нейкі момант наш сябар раптам зразумеў, што нешта з яго вачамі не так.
Затым былі паходы па лекарах і спробы зразумець, што адбываецца. Мікіта абышоў усіх магчымых спецыялістаў у Беларусі. А мы, сябры, памагалі яму ў тым ліку і фінансава. Аднак хвароба прагрэсавала.
Цяпер мы знайшлі клініку ў Нямеччыне (Asklepios Klinik Barmbek), якая згодна ўзяць Мікіту на лячэнне. Аднак нямецкія лекары сумняваюцца ў тым дыягназе, які паставілі Мікіту беларускія калегі (частковая атрафія зрокавых нерваў з адпаведнымі ўскладненнямі) і запыталі паўторнае абследаванне.
Але на гэтым этапе ў нас скончыліся грошы. Мы вельмі жадаем дапамагчы Мікіту, таму звяртаемся да вас па дапамогу. Мы хочам аплаціць нашаму сябру дарогу і абследаванне. А далей, маючы на руках дыягназ і план лячэння, будзем шукаць арганізацыі, якія дапамогуць Мікіту.
Мы разумеем, што нават калі ўсё складзецца вельмі добра для Мікіты, ён усё адно ніколі больш не зможа бачыць свет, як раней. Але мы жадаем аднавіць яго вочы наколькі гэта магчыма. бо Мікіта наш сябар і мы яго любім.
*імя героя было зменена ў мэтах бяспекі – нататка BYSOL
BYSOL таксама мае ўсе медыцынскія дакументы, якія пацвярджаюць гісторыю
Сума збору:
€3500
€720 – квіткі для двух асобаў (патрэбен суправаджальны) да Гамбурга і назад
€700 – гатэль у Гамбургу на 4 ночы недалёка ад клінікі
€1400 – абследаванне ў клініцы *
€400 – ежа ў дарозе на дваіх
€280 – непрадбачаныя выдаткі
*Будуць праведзены наступныя працэдуры: шырокае абследаванне вачэй, у тым ліку афтальмаскапія, танаметрыя, даследаванне з дапамогай шчыліннай лямпы, ганіяскапія, фундаскапія (вочнае дно), перыметрыскапія і іншыя працэдуры.