BYSOL у жніўні. Справаздача за месяц

За гэты месяц мы разам сабралі амаль 68 тысяч еўра, пры гэтым завяршылі 22 асабістыя зборы. Лічбы, якія сведчаць пра нашу салідарнасць і гатоўнасць дапамагаць, дзяліцца, падтрымліваць!

У жніўні 2025 года BYSOL адзначыў пяты дзень нараджэння! Мы ўдзячныя за ўсе цёплыя словы і віншаванні: бачым, што наша праца патрэбная і каштоўная. Сярод 22 завершаных збораў вы знойдзеце зусім розных людзей — жанчын і мужчын розных прафесій і ўзростаў. Ад ананімных збораў да вядомых імёнаў. Аб’ядноўвае іх адно: людзі трапілі ў бяду і не засталіся без падтрымкі.

Мы дапамаглі сабраць грошы для Кацярыны, мастачкі з Гродна, якая была вымушаная з’ехаць з Беларусі праз пераслед. Для Дэвіда з Пінска, які ў 19 гадоў трапіў у няволю, правёў у зняволенні чатыры доўгія гады і цяпер спрабуе адаптавацца ў Польшчы. Яшчэ адзін важны збор — для валанцёркі Вольгі, якая, знаходзячыся ў Беларусі, актыўна дапамагала рэпрэсаваным. Таксама ў гэтым месяцы былі завершаныя зборы для вядомых людзей — палітыка Сяргея Ціханоўскага і акцёра Сяргея Толсцікава.

Дзякуем усім за падтрымку і салідарнасць!