Валанцёрская ініцыятыва «Майстэрня паштовак салідарнасці» дзейнічае з моманту першых затрыманняў актывістаў у 2020 годзе. З таго часу мы распрацавалі дызайны і надрукавалі тысячы паштовак, адправілі больш за 15000 вестачак за краты, правялі сотню сустрэч падпісання паштовак салідарнасці ў Беларусі і краінах эміграцыі, сфармавалі валанцёрскі рух, які дагэтуль сваімі рукамі перапісвае ад рукі пажаданні з анлайн-формы і шле паштоўкі і лісты зняволеным.
Чаму важна пісаць палітвязням?
Мы верым, што «беларус беларусу беларус», таму для нас важна ствараць і падтрымліваць супольнасць вакол тэмы салідарнасці з палітвязнямі. Кожны ліст, кожнае слова, кожны выраз падтрымкі дапамагае стварыць магутны голас, які парушае маўчанне і паказвае зняволеным, што яны не самотныя ў барацьбе за свабоду і справядлівасць.
«Нястомнае напісанне паштовак, лістоў, тэлеграм палітычным зняволеным, віншаванні з Днём Нараджэння, з Новым годам, з іншымі святамі, з 25 сакавіка — гэта вельмі важныя моманты, якія сапраўды падтрымліваюць іх і ўмацоўваюць псіхіку, робяць мацнейшымі ў гэтых няпростых абставінах. Спадзяюся, што людзі не будуць пакідаць і забываць палітычных зняволеных», — Алесь Бяляцкі, палітычны зняволены, старшыня і заснавальнік ПЦ «Вясна», лаўрэат Нобелеўскай прэміі міру.
Чым мы адрозніваемся ад іншых сэрвісаў па адпраўцы лістоў зняволеным?
Наша анлайн-форма дазваляе падтрымаць вязняў з любой кропкі свету. Кожную вестачку мы старана перапісваем ад рукі на паштоўку і дасылаем вязням са скрыняў Белпошты. Так зняволены адчувае больш увагі і клопату, а шанец ліста дайсці да адрасата значна вышэйшы. Нашы валанцёры і валанцёркі таксама дадаюць парфуму на паштоўкі, кладуць налепкі і іншымі метадамі ўпрыгожваюць адпраўленні для вязняў.
Апроч гэтага, мы актыўна праводзім валанцёрскія афлайн сустрэчы па падпісанні паштовак, дзе кожны жадаючы/ая можа напісаць вестачку, якую мы потым перадаем зняволеным. Мы заўсёды гатовы дапамагчы з напісаннем вестачак і расказаць, як пачаць або працягнуць пісаць зняволеным лісты.
Уся наша праца праводзіцца на валантэрскіх пачатках, таму «Майстэрні паштовак салідарнасці» як ніколі патрэбна Ваша падтрымка.
Якая сума неабходная?
20000 — збор сродкаў адкрыты для наступных патрэб: друк паштовак для адпраўкі зняволеным; купля канвертаў і паштовых марак; падтрымка правядзення валанцёрскіх сустрэч па напісанні лістоў і паштовак салідарнасці; падтрымка асвятлення тэмы ў сацыяльных сетках.
У нас шмат амбіцыёзных планаў, і мы не спынімся, пакуль апошні палітычны вязень не будзе вызвалены.
Дзякуй за салідарнасць!